Correct Theology Rev. Ramengliana

CORRECT THEOLOGY
Rev. Ramengliana
Hman deuhah khan ka hlawkpui tak Mission Conference ka tel a. Kan thusawitu
pakhatin min zirtir point tha tak tak 8 a thlan chhuah zinga a hmasa ber chu “Mission
is a matter of correct theology,” tih a ni. ‘Rawngbawlna chu Pathian Thu pawm dan
leh zirtir dan dik chungchang a ni.’ a ti a nih chu. Tha ka tiin mak tihna chhan riau
pawh ka nei. Mission kan ti emaw, Chanchin Tha hril kan ti emaw, rawngbawlna kan
ti emaw-ah hian ‘correct theology’ hian hmun lailum a chang lo fo. Miin hlawkpuia
kan hriat chuan ‘theology’ chu hnawk kan ti mai thin a. Chhandam an ni thei dawna
kan hriat chuan ‘thurin dik’ chu daltu pakhata ngaih a awl khawp mai. Thenkhat phei
chuan an hmu ‘setana’ lek lek a. Mahse he resource person hian No. 1-ah a dah miau
si a, ka pawm zawng tak a ni nghe nghe. Tunlai khawvela ringtuten ‘correct theology’
kan mamawhna ruam thenkhat han thlur leh lawk ila.
1. Pathian chu Hmangaihtu a ni a, Roreltu a ni bawk :

Thiamchantirtu a ni a, thiamlohchantirtu pawh a ni. Vanrama min hruai luttu hi
hremhmuna mi tam tak hnawltu a ni tel. Kan thiltih vang ni lova min chhandamtu hi
kan thiltih ang zela ro min relsaktu tur a ni a. Pathian zaidam tak a nih lai hian Pathian
duh rum tak a ni. Pathian khawl hman hian a her vut vut lo a nih pawhin a her vek vek
hi chu a her chip dap thin tih hi kan hriat a ngai. He thu pahnih hi thil inzawm reng a
ni a, sawi kawp zel tur a ni, kan nun hian a hre kawp tur a ni mawlh ang.
Tunlaia thil pawi tak chu kan Speaker tam tak hian Simna thu te hi an sawi tha ngam
ta lo hi a ni. Sawi pial hram hram an tum emaw tih turin an thusawiah simna aia
pawimawh hmasa zawk a lang fo mai. Pathianin min hmangaih chhan chu a rorelna
boruak a na dawn lutuk a, thiam kan chan theih nan a theih zawng zawng a thawh a ni
a. Mihringa sual bei tlat hi a ten em avangin a sil fai theih nan a Fapa thisen a rawn
hmang a ni zawk si a. Rorelna a nat dawn em avanga hmangaihnaa min en ngawih
ngawih a ni zawk a, sual simna tel lovin Chhandamna a awm dawn si lo a.
2. Isua Krista chu Chhandamtu a ni a, Lal a ni bawk :

Min chhandamtu a nihzia hi kan hlimpui tluk hian lal a nih hi kan hlimpui ve tho em?
Mi Chhandamtu a nihna hril nuam ka tih angin ka nuna Lal a nihzia hi mite hmuhah a
lang pha em? A mite chhandamtu a ni a, A mite chuan Lal dang an nei lo. Lala nei
lote chu a chhandamte an ni ngai lo va; a chhandamte chuan Ani lo chu Lal atan an
duh ngai lo. Chhandamtu a nihna leh Lal a nihna then hran theih a ni lo a nia.
Thlarau nunah hian rinna leh thiltih then hran duhna hi a lian viau reng a. ‘Correct
theology’ chuan a sut a ngai reng mai a ni. Isua hi mahni nuna Lal atana hmang si lo
va, chhandamtu atana hman theih dan zawng ruai turin Bumtua chuan bum tur a
zawng run run reng mai. Heti zawnga sawi thiam deuhte hi ‘rau’ riauvin kan ngai fo
lehnghal a. Mak tak a ni. Isua nihna hi thenhran theih a nih loh avangin rinna leh
thiltih then hran theih a ni lo va; chhandam ka nihna leh kan nuna Lal a nihna hi a
inzawm reng a ni. I nunah hei hi a fuh loh chuan fel hlel a awm tihna a ni mai.
3. Thlarau Thianghlim chu Tinuamtu Thlarau ni lovin Tichaktu Thlarau a ni :

Thuthlung Tharah chuan Thlarau Thianghlim nihna chi hrang hrang zingah ‘tinuamtu’
tih hi a awm lo a ni. Min tihlima min chawknutu thlarau ni ber lovin min
tithianghlima, min zirtirtu Thlarau a ni. Hlimna hrim hrim te, phurna hrim hrimte chu
khawvel thlarau pawhin a pe thei a, ringlote pawhin hlima, phur hun tam tak an nei, an
hun tawn azirin. Mahse, Thlarau Thianghlim erawh chu Kraws kawnga lungawina leh
lawmna min petu Thlarau a ni. Krista tana tuar mek laia min ‘Haleluiah’ tir theitu chu
Thlarau Thianghlim chiah a ni. Khawvel hian Kristian hlim hrim hrim, lawm hrim
hrim an hmu duh ber lo. “An mawl mang e,” an ti mai mai ang. Kraws pu reng chunga
lungawina leh hlimna an hmuhin a ngaihna an hre lo zawk a ni.
Tunlai khawvelah hian hei hi kan hriat a va pawimawh ber em! Thlarau Thianghlim
hnathawh kan chakna chhan hi hlim boruak kan ngaih vang a ni tlangpui. Min
tinuamtu thlarau atan kan duh ngawih ngawih, mahse min tithianghlimtu thlarau a ni
zawk tlat si. Sual pawm bet chunga min tilawm tho tur chi a ni lo a, i nuna sual zung
zam zawng zawng thuah faitu tur zawk a nih kha. Chu sual hmachhawn leh thuahfaina
kawnga i chau tur tichaktu che a ni a; i beidawng mai tur fuihtu che a ni a; i mangan
huna thlamuantu tur che a ni zawk e.
4. Kohhran chu Chanchin Tha kawltu ni mai lovin, Chanchin Tha hmuh theiha
awm a ni :
Thu chu Tisaah a lo chang a, Nazareth Isua kan hmu. Chanchin Tha chu hmuh theihin
a rawn awm a, Kohhran kan hmu. Kohhran hian buaipui leh tulpui a va phu tak em!
Pawl zawng zawng zinga ngaihhlut ber tur a nihzia a va chiang em! Fimkhur taka
thiltih a va pawimawh tehreng em! Mahse, tunlai khawvela kohhran mite hian chu
Chanchin Tha chu kan pho lang tha tawk lo niin a va lang si em! Kohhran program te
chu a la tha reng e, kan thurin pawh a la fuh reng a, kan thusawite pawh a la dik viau
zel e. Mahse kan mimal nun lam hian a phur chhuak zo meuh lo em ni le? Kan thil
kawlah kan lawm tawk a, kawl tir kan nih chhan ber –khawvel hmuh atan kan chhawp
chhuak tha hleithei bawk si lo a ang e. Kan Pathian hian khawvela Krista taksa
khawsak dan ACR hi lo ziak keuh keuh ta sela kan grade hi a chhe viau lovang maw?
Thenkhat chuan, ‘Kohhran aw hi Pathian aw a ni,’ han tih te hi an hre thelh chiang hle
mai. Kohhranin a tih tih chu Pathian tih emaw ti tawk an awm hial a nia! Kohhran
hruaitu nih ngaihthatpui ta mai mai pawh awm theih a ni awm asin. Chutiang ni se
‘Protestant’ kohhran kan awm lo tur! Paula khan Korint khua kohhran mite kha a hau
zek lo tur! Kohhran hi Pathian a ni lo tih chian a tha, Kohhran rorelna hian a tisual thei
bawk a. Chuvangin mawhphurhna nei zawng zawngten ‘correct theology’-a innghat a,
tawngtaina nena fimkhur taka mahni hmasialna leh chapona tel lo thei ang bera rel tur
an ni zawk. Kohhran aw hi Pathian aw dik tak a nih zel theih nan Kohhran leh Pathian
hmangaihtu chuan tuar pawh huamin a tang fat fat zawk a ni. Miin Kohhran aw hi
Pathian aw anga a pawm hian Kohhran a hmangaihzia, a dahsanzia leh a intukluhna a
lantir mai a ni zawk a. Chutiang taka Kohhran tana inpumpekna boruakah chuan
Pathian aw chu Kohhran kaltlangin a hre nge nge thin a, mite pawhin Pathian aw leh
kaihhruaina chu an lo dawng thin a ni.

Correct Theology Rev. Ramengliana

Uploaded by

Copyright:

Available Formats

Correct Theology Rev. Ramengliana

Uploaded by

Document Information

Original Title

Copyright

Available Formats

Share this document

Share or Embed Document

Sharing Options

Did you find this document useful?

Is this content inappropriate?

Copyright:

Available Formats

Correct Theology Rev. Ramengliana

Uploaded by

Copyright:

Available Formats

CORRECT THEOLOGY

1. Pathian chu Hmangaihtu a ni a, Roreltu a ni bawk :

2. Isua Krista chu Chhandamtu a ni a, Lal a ni bawk :

3. Thlarau Thianghlim chu Tinuamtu Thlarau ni lovin Tichaktu Thlarau a ni :

You might also like