MODERATOR VALEDICTORY SERMON 2010

THLEN CHIN ATANGA HMASAWN (I Thes. 5:16-16; Phil. 3:16)

Rev. C. Chawngliana

THUHMA
Kan Synod Inkhawmpui duhsakna avangin hna ropui tak Synod Moderator rawngbawl
hna ka kova nghah a nih tirh phat atangin ka huphurh em em a, ka ngaihtuahna pawh a
chiai viau a. Phat chi ni se phat pawh ka duh hial a, mahse tumah an la phat ngai si loh
avangin kan pha ngam bawk si lova. Kan nupain nasa takin kan tawngtai a. Pathian chakna
ringa kal mai tur kan nihzia leh he hna zahawm tak leh ropui tak thawk tur hian Kohhranho
hmangin min thlang a, Amah rinchhana theih tawp chhuaha thawk mai tur kan ni zawk e,
tiin kan Amen thei ta a. Ka term chak lo chung pawha ka lo hmang zo ve thei ta hi ka lawm
a, Pathian hnenah lawmthu ka sawi a ni.

LAWMTHU:
Zaninah hian lawmthu sawi chunga hmasawnna thu kan sawi dawn a ni.
I Thessalonika 5:16-18 kan chhiarah khan lawm tur leh lawmthu hril fo turin min duh a, lawmthu
sawi hmasak hi a tulin ka hria.

Moderator ni tura duhsakna min petu Synod Inkhawmpui chungah lawmthu ka sawi hmasa
ber duh a.

Moderator ka nih chhung zawnga min tawngtaisaktu Kohhran, chhungkua leh mimalte
hnenah lawmthu ka sawi a. Nikum Synod Inkhawmpui lai khan ka tihsual min hlauh pui
bakah Moderator hna tha taka ka thawh theih nan min tawngtaisaktu an tam em em tih
ka hria a. Rorel laite, nemngheh laite leh Sacrament hunah te TV-a kan programme
enchunga thingthi-a min lo tawngtaisakte pawh an awm hial a. Tawngtaisakna ka dawn
hi ka chakna bul tih ka hrechiang hle a, tawngtaina thiltih theihzia ka hriatchian zual phah
hlein ka inhria.

2009 Synod Inkhawmpui palai zawng zawngte dawhtheihna leh min tanpuina azarah
Inkhawmpui rorel kha boruak tha tak hnuaiah kan zo thei kha ka lawm a. Ka han ngaihtuah
let hian rorelna kha engtin nge ka lo kaihhruai ve theih mai kha aw ka ti a, Palaite te khan
min tanpui nasa em a ni tih chu ka rilrua lian ber a ni a, palaite chungah khan lawmthu ka
sawi a ni.

Kumtluanin kan committee deuh reng a ni ber a. Ka rawngbawlpui bulpuite, OM member

Kohhran ka tlawh zawng zawngin ei leh in, thlenin, thusawina hun leh duhsakna tam tak
min pek avang te khan ka lawm a, ka nun a khawih hle thin. Kohhran leh khua ka la hmuh
ngai loh tam tak ka hmu a, a hlu ka ti hle a ni. Tinghmun khua kan kal tumin kawng a chhiat
avangin ke in thui tak kan kal a, bike-in min rawn hruai ta a, heta min hruaitu hi UPC Upa a
ni a, a lawmawm zual hle a. Palsang Kohhran pawhin Moderator lo lawm nan ran talh turte
lo thlungin Kohhranho nasa takin an lo inbuatsaih a, kawngchhia avangin kan tlawh thei ta
lova, pawi kan ti hle a ni. Moderator an lo dah pawimawh em em mai hi a lawmawm tak
zet a ni.

Kumtluana ka zinnaa motor min khalhsaktu Pu F.Rawntlinga hian Moderator motor a khalh
dawn tih a hriat atangin kuhva a nghei nghal hmak a, kumtluanin a nghei a, a inpekna leh
inbuatsaihna hi lawmawm ka ti hle a, Inkhawmpui hmaah han sawilan ngei hi ka duh a ni.
Buhfaitham Centenary kum a ni a, Central Kohhran Hmeichhia-in ropui takin an lawm a,
keipawh hun tha tak min pe a, a lawmawm ka ti hle. Buhfaitham film hi 3rd Lussane Con-
gress, Cape Town, South Africa-ah khawvel hmuh turin chhuah a ni a, Buhfaitham
rawngbawlna hi khawvelin an hre ta hi a lawmawm khawp mai. Mizoram kohhran pawh
khawvelin min hriatphah ve tak avang pawhin a lawmawm lehzual a ni.

Kohhran pawhin hma kan sawn hle a, kohhran puitling 113 -in a pung a, Branch Church
322-in a pung a, Pastor Bial 13-in a pung bawk a, member 12,034-in kan pung bawk a, kan
hmasawnna hi a ropui a, a lawmawm a ni.

Synod hnuaiah Pastor-a ka thawh hmain Missionary-in kum 9 ka lo thawk hman a, Pastoral
hnuaiah kum 27 ka thawk leh a, kum 36 chhung zet Synod hnuaia ka thawh hnuin kum
tharah Pension-in ka lo chhuak ve dawn ta a. Pension-a ka chhuak ve thei tur hi ka lawm a,
Moderator nihna atanga ka pension tur hi a ropui ka ti a, ka lawm lehzual a ni. Rev. ZT
Sangkhuman a pension dawna a sawi kha a hlimawm viau a, 'Berampu ni thin kha beram
ka ni tawh dawn a, ka bê thiam lovang tih pawh ka hlau ve' a tih kha. Zoram pum pawh ni
mai lo, ram pawn zau tak huam tela bialtu khan kan chansan berah Upaten Upa Bial khat
hi lo bial ve ta che an tih phal chuan Upa Bial khat kan bial ve dawn emaw a ni ang a, kan
thiam lo mai ang tih pawh a hlauhawm khawp mai. Mahse, Pathian rawngbawlna a nih
phawt chuan thiam erawh chu ka tum a ni.

PCI hotute hmalaknain CWM missionary tur mi pakua lak tura tihfel a ni a, hetah hian kan
Synod atangin pasarih an ni a, hmasawnna lawmawm tak a ni. PCI hotute chungah pawh
lawmthu ka sawi a ni.

Hneh taka min thlengtu Dawrpui Pastor Bial Kohhran tinte hnenah hian lawmthu sawilan ve
ngei hi ka duh a, a innghahna Zarkawt Kohhran chungah lawmthu ka sawi bawk a ni.
Pathian ni hmasa khan Dawrpui Kohhran Zaipawl te nen kohhran tlawhin kan chhuakho a,
ka lawm a, zaninah Zaipawlpui an han zai leh thei hi ka lawm hle a ni.

KAN THLEN CHIN ATANGIN HMA I SAWN ZEL ANG U - (Phil. 3:16)
Kan thupui atan "Hma i sawn zel ang u" tih hi ka han thlang a. He thu sawi tura ka inbuatsaih
lai hian Aizawl Auxiliary hawn tuma Synod Office a BSI hotupa thusawi kha ka hrechhuak a,
"Mizoram hian BSI-ah hian in titha em mai a, fuihna tur che u pawh ka hre lo. Thusawi tur ka
nih avangin kan thlen chin atangin hma I sawn zel ang u tih ka sawi mai ang" a tih kha ka
hre reng a. Kan Synod hmalaknapengitfang hrang hi a tam hle a, dik tak chuan kan thawk
nasa a, a thawh pawh kan thawk tha a ni. Khawrihnim Upa phei chuan kan kohhran hi tha
an ti khawp a, 'Presbyterian member ni che che tawh phawt chu vanramah an kai vek
ang' a ti a ni. Ani hi thil hlimawm tak a ti chi a ni mai thei. Vawi khat chu inkhawm Chairman
a ni a. Thusawitu a sawm a, 'Zanina hun neitu tur hi thuhrilmi a ni a, ngun takin i lo ngaithla
ang, i lo sawm tawh ang' a ti a. Amah chu thusawi turin Pulpit-ah a lawn ta a, uar takin thu
a sawi a. A sawi zawhah Chair-a a lo chhuk leh chuan, "Zanina kan thusawitu chuan a sawi
tha hle mai" an ti zui leh a. Kohhran a tihlim thiam viau awm e.

MISSION RAWNGBAWLNA LAMAH -

Tunah hian Mission field kan lo ngah ta hle a. Tin, missionary pawh 1700 vel zet kan lo nei ta
a, a lawmawm hle mai. Kan la intirh belh zel nghe nghe dawn a ni. Field tina kan kohhran
te hi han enchian deuh erawh chuan mahni kea ding thei tur hmel an la awm lo hle mai.
Kan rawngbawlna hmasa te hi a kum thuah chuan anmahni kea ding thei tawh awm tak
an nih laiin tumah ding thei tur hmel an la awm si lo. Ramthar kohhran kan duhsakna leh
hmangaihna hi enfiah a tha. Nuin a fa a hmangaih avangin ei tur tuihnai tha tha a pe vak
vak a, a tawpah a hriselnain a tuar a, a chhiat phah leh si ang hi a ni palh ang tih a
hlauhawm. Nu fing chuan a fa duhzawng apiang pe lovin an thatna tur tawkin a enkawl
thin. Kan hmangaihna hian an puitlinna a hawi em tih kan inenfiah a tul. Tha leh sum tam
tak kan sen hi rah tha chhuah lova a thamral loh nan ruahmanna tha zawk neih tulin a
lang.

Keima experience tlem te atanga ka han sawi ve duh chu Tripura field-a kohhran thenkhat,
hun rei tak missionary ten an thutchilh tawh chu an che thei lo viau a, thawktu tello chuan
tih theih neiin an inhre tlat lo. Mahse, thawktu chu hmun dangah sawn chhuah an han ni ta
a, anmahni kuta hmalakna engkim a han awm takah chuan a hma aia chak ta zawka
lang thei hial khawpin an phurin hma an sawn tlat a ni. Kan awpbet lutuk em tih inenfiah a
tul khawp mai. An tih ve theih reng tur kan tihsak nasa lutuk em, an mawhphurhna leh an
tihtur kan chhawk nasa lutuk em tihte pawh zirchian a tha. Kan duh ang tak an tlin lo deuh
anih pawhin dawhthei takin kaihruai ila, an theihna hmang turin chanvo nei se la, an thang
tha zawk ngei ang. Mizote hian fate kan ring har a, kan naupang chhe chei rei a, an
puitling har a ni. Thalai engmah tih tur hre lo pawh hi an tam hlein a lang. Hnam fingho
chuan an fate an ring hma a, an puilting hma hle bawk. He kan zia hi kan Mission Field-a
kan fate ah pawh kan kalpui zel a, puiltin hun an nei lawk lovang tih a hlauhawm. Kan
hmalaknaah hian kan ringthar ten puitlinna kawng zawha hma an sawn theih nan
ngaihtuahna hmang tharin hmasawn I tum teh ang u.

KOHHRAN LIANIN KOHHRAN RETHEI ZAWKTE TANPUI -

Kan ramah mipui nun leh khawsakna hi a kai rual lo hle a. Khawpuiah sum a tam hle laiin
thingtlang khaw tam ber hi chu an rethei hle a ni. Kohhran dinhmun pawh chutiang chiah
chuan a inthlau a. Chuvangin khawpui kohhran te hian thingtlanga kan kohhran puih ngai
tak takte tanpui turin i inngaihtuah thar ang u. Hei hian inunauna, inpumkhatna tha lehzual
a siam anga; kohhran pawl dang nena innawkna karah min tinghet lehzual ngei ang.

Amaherawhchu, kohhranhote insiamthatna tur chu a awm tho mai. Presbyterian kohhran
rilru chu mahni kea din, mahni intodelh, kutdawh loh kha a ni thin a,tunlai khawvel nun
inher vel hian kohhran rilru pawh min tidanglam ve ta deuh em ni aw tih theihin a awm ta.
Hetiang boruak karah hian kohhran tinin Presbyterian rilru kha i hre reng ang u. Chutih
rualin harsa tak tak hi kan awm tho avangin pui theitu dinhmuna dingte chuan kan unaute
tanpuina lamah hian hmathar i la teh ang u. Chu chuan kan ram pum kohhran hi min
tinghet lehzual ngei ang.

Synod in sum a ngah tih tawngkam hi a lawmawm rualin kan fimkhur erawh chu a ngai
hlein ka hria. Synod kan beisei danah pawh chintawk neih ngai a awm. Sum leh pai hi kan
chapo pui mai ang tih hi a hlauhawm hle a ni. Sumah hian kohhran hi a innghat lova,
kohhran innghahna chu Lal Isua Krista ah a ni tih i hre reng ang u. Kohhran nghet taka a din
theihna tur leh ropui taka a din zel theihna tur chu sum leh paiah ni lovin Pathiana
innghahnaah hian a ni zawk. Heng malsawmna tam tak kan dawnte hi a duhzawng
kohhranin a tih avanga malsawmna dawng chauh kan ni tih hi i hre reng ang u. Sum hi chu
hmanrua mai a ni. 'Lalpa ringtu a rinchhan Lalpa ni erawh chu a eng a thawl e, tui kianga
thingphun, luikama zung kai, khaw lum lo thleng pawh hlau lo, a hnahte hring reng si,
khawkhen kum pawisa lo, rah thulh chuang si lo ang hi a ni ang' tih a nih kha (Jeremiah
17:7-8)

HMANGAIHNA IN -

Hmangaihna In, Durtlang ami chu Central Hmeichhe hruaitu thenkhatte nen kan tlawha,
kan hmalakna chinah chuan a lawmawm hle. Amaherawhchu, kan naupang enkawlte
kum li an tlinin lakchhuah ngei ngei a ngai a, an nu leh an pa kaihruaitu tha awm chuang
si lo hnenah dah luh leh tho an ngai hi ngaihtuah chian a ngai hlein ka hria. Rahbi tleu
dinhmuna luh leh tho kha an hmabak a, puilting zawka dawmchhuah dan ngaihtuah
theih nise a tul hle mai. Tunah hian seat 50 kan nei a, a zahve vel chauh an awm a, kan
kumbi tuk hian mi tam tak a hnar deuh em ni aw a tih theih. Ram pum hriat khawpa tihlen
ni thei se, Synod tan pawh a tha khawpin a rinawm, hmasawnna tur a la tam hle mai.

RAWNGBAWLTUTEN TAN LAK A NGAI -

Synod hnuaiah hian thlatin lawmman la, rawngbawlna peng hrang hrangah thawktu 3000
dawn lai kan awm ta a, a lawmawm a ni. Heti zat zingah hi chuan lo petek palh pawh
awm se a mak love. Rawngbawltu tam berte thahnemngaihna leh inpekna hi ngun taka
ka phak tawka ka thlirin fakawm ka ti a, kan kohhran pawh vannei ka inti, lawmthu sawi tur
a tam hle a ni. Ka lawmna em em pakhat chu kumin chhunga Synod Committee zawng
zawng deuh thaw a ka han tel ve hian Synod rorelna miten fel lo, lai lo deuha an sawi zeuh
zeuh thin hi a dik lo a ni, an hre fuh lo a ni tih hi ka hmu chiang ta hle a. Tupawhin Pathian
tih takin, a tha ber tur nia an hriatin ro an rel tih ka hmuh hian min tithlamuang a, ralkhat ti
ti hi innghahna tur a ni lo tih hi Synod palaite pawh hian hawn theuh ila ka duh a ni.

Hnam dang Pastor te rawngbawlna kan hmuh hian kan Pastorte rawngbawl danah pawh
hi an lawmthu sawi tur a tam ka ti. Mitthi vui man kan la la ve lo a, kan ral zui zawk a;
inneihtir man kan la la ve lo a, lawmpuina kan pe fo zawk a. Khawpui atanga mahni bial
vawng mai lovin Bial Station-ah kan awm thap mai a, kan nupuite pawh kan Pastor Qtr.
nghaktu tha tak an ni deuh vek bawk a. Home Visit kan neih anga nei tha hi Pastor dang
an awm ve hi ka ring lo. Kan thasen nen lam fet taka en thlap a ni thin. Inkhawm a tam a,
thusawi reng a ngai a, chhiatni thatni nen, kan hun hman dan hi a tha tawk hle a ni a tih
theih.

Posting leh Transfer chungchangah pawh Inkhawmpui thu a nih chuan, kan chaklohna
mualah pawh lungawi takin kan kai zel mai te hi a lawmawm ngawt mai. Mahni awm
duhna sawia hotute hnena Campaign te hi thil tih chi loh, zahthlakah kan ngai te hi a tha
mang e. Keima mimal kan insawi tlazep lawk anga, min lo hriatthiam ka duh a. Ka service
tirh atanga ka hun tawp thlengin Posting leh Transfer chungchangah hotute vawikhat mah
ka be lo tluanchhuak a, min dahna apiang kha Pathian remruatah ka ngai a; hei hi keima
tan a lo tha ber nghe nghe a, ka awmna apiangah lungawi takin ka hun ka hman zawh
theih phah niin ka hria a, ka lawm hle a ni. Kohhran rorelna hi Pathian remruatna anga kan
pawm theih loh a, tu emaw avanga hmun hrehawma awm, tu emaw avanga hmun nuama
awm anga kan inngaihtuah chuan rawngbawltu tha kan ni thei lo ang. Thawhhona
chungchangah pawh kan Pastor senior zinga pakhat tawngkam hian min hneh hle a,
'tupawh thawhpui theih ka tum' a ti. Kan tum phawt chuan kan thei theuh ang. Zirtur ropui
tak a tling a ni.

Heti chung hian kan inenfiahna tur pawimawh tak erawhchu sawi duh ka nei. Synod hnuaia
hna zawng zawng hi pawisaa teh a, mahni hlawkna uma thawh chi a ni lo. A tul chuan
chawi huam, tuar ngam, mahni hna leh hun bi piah lamah pawh inpe ngamte thawhna
tur a ni. Chuta tang chuan kan kohhran hian hma a sawn zel ang. Hetah hian hma sawn i
tum teh ang u.

ZUK LEH HMUAM -

Tum khat chu Penticost niin kohhran pakhatah Upa chairman tur chu suit leh necktie nen
nalh takin a inchei a, Chairman thutnaah a han inbihchianga, a pheikhawk bun a lehlam
savun pheikhawk pangngai tha tak, a lehlam erawhchu Snicker a lo bun, a inhmuhchian
hmaa nalh viau a inhria kha a han inbihchian chuan min an hmu ang tih a hlau ta em em
a, inkhawm banah pawhmuang changin mi hnungah a haw phah a ni. Kan kohhran hian
kawng tam takah thatna leh mawina kan neih laiin chik zawka kan inenfiah ngai erawh a
awm.

Kan pi leh pute atanga zuk leh hmuam lo inzirtir a, naupan tet atanga lo ti thin kan ni a. sim
a har a ni tih chhuanlama mi tam berin zuk leh hmuam kan ti nasa lutuk hi kan hnam leh
kan Kristianna kan tihmualpho nasat na lai tak a tling ta a ni. Pastor leh Upa rualte hian sim
turin hma i la thar ang u hmiang. Revival Speaker-te leh KTP hruaitute pawh hian tan la sela
chuan kan ram thalaite hi an hruai duakin a rinawm a, an mawhphurhna a sang khawp
mai. Missionary te leh Synod hnuaia thawk zawng zawngte pawh hian tan la ajhmasawn
tum a tul hle a ni.

A ruh lang rawta han sawi tel duh ka nei a. Pro Pastor tur chuan zuk leh hmuam ti chu lak
loh tur Synod in a ti a, Interview ah zuk leh hmuam ti lo veka insawi si a, lak fel tawh hnuah
insum leh chuang si lo, kohhran ho pawhin an ngaihmawh em em te an awm ta nual mai
em aw! chutiang mite chu nemngheh ni ta tho si te pawh awm theih niin a lang ta. Kohhranin
min report zui lo mahse kan thutiamna kohhran leh Pathian hi kan zah tur a ni dawn lawm
ni. Huai tak leh dik taka Pathian thu sawi tur chuan mahni kan inenfiah ngam a tul thin. A
harsa a nih pawhin hmasawn i tum ang u. Thil tam takah kan tha mai thei mahse inenfiah
ila, siamthat ngai, hmasawnna tur kan nei mai thei asin.

A tawp berah chuan Pathian Thlarau Thianghlim a chet reng theihna turin Kohhranho hian
rinawmna, dikna, thianghlimna i vawng nung tlat ang u. Kan dinna chinah hian duh tawk
mai lovin hma lama kal zel turin tan i la ang u. Thiltha tam tak kan ti a, kan sawi seng lo hial
zawk a, lawmna tur a tam. Chutih laiin Paulan Ephesi Kohhran thil tha tam tak titute hnenah
hma i sawn zel phawt ang u, a tih angin hmsawnna tur tam tak kan neih hi hre rengin kan
thlen chin atang hian hma i sawn zel ang u.

Lalpan a thu kan sawi mai min sawmsak rawh se. AMEN.