FILSOS 1115 – SINESOSYEDAD/ PELIKULANG PANLIPUNAN

Modyul 1
Aralin 2: Mga Elemento at Gabay sa
Panunuring Pampelikula
Paunang Salita (Overview)
Masusuri ang kasiningan at kahusayan ng Pelikulag Pilipino sa pamamagitan ng
pagrebyu o pagsusuri ng mga elemento nito. Sa pagsusuri ng mga pelikula,
magbibigay ito ng linaw sa mga manonood sa mga mensahe at simbolismong
umaangat dito. Masusuri rin ang mga teoryang pampanitikan sa isang pelikula. Hindi
lamang natatapos ang pagsusuri sa mga element at teorya lamang kundi
nangangailagan din ng ibayong pag-aaral upang magkroon ng isang mahusay na
papel.

I. Paglalahad ng mga Layunin ( Objectives )

Matapos ang aralin, inaasahang maisasagawa ng mga mag-aaral ang sumusunod:

1. Maiisa-isa ang mga elemento ng pelikula.

2. Matukoy ang mga hakbang sa pagsusuri ng pelikula.
3. Makapagbigay ng sariling pananaw sa kahalagahan ng pagsusuri ng pelikula.
4. Mailapat ang mga natutuhan sa pagsusuring pampelikula.

II. Pagtalakay sa Aralin ( Discussion )

Panimulang Gawain

Bago tayo magkaroon ng pormal na talakay sa aralin, hinihiling ko na gawin mo

ito:
Kapag ikaw ay pumupunta sa sinehan ano ang iyong mga isinasaalang-alang sa
pagpili ng pelikulang iyong panonoorin?
 Pag-isipan at pagnilayang mabuti. Magtungo sa inyong google classroom upang
sagutin ang tanong na ito.

Pagsulat ng Rebyu ng Pelikula

Ang pelikula ay isang integratibong sining, biswal na midyum at daynamikong
naratibo ng iba’t ibang paksain, pangyayari, genre, at panahon na nagaganap sa harap ng
manonood sa pinilakang tabing (silver screen). Masasabi rin na ito ay multimedia dahil
kasangkot sa pelikula ang iba pang sining tulad ng musika, teatro, literature, at potograpiya.
Ang pelikula ay biswal na midyum dahil buhat sa nakasanayan nating nakasulat na midyum
tulad ng aklat, inihahatid ng pelikula ang maraming mensahe at teksto sa paraang
audiovisual. Nagaganap ang lahat ng ito sa paningin at pandinig ng manonood na
sumasaling din sa pandama niya lalo na kung drama, komedi, o aksyon ang genre ng
pelikula.
Mayroong dalawang mahalagang hakbang bago makapagsulat ng rebuy ng
pelikula:
1. Tangkilikin at pahalagahan ang pelikula (film appreciation). Walang
maisusulat na rebuy kung hindi mo napanood ang pelikula. Sa mga bihasang
kritiko ng pelikula, madalas na higit sa dalawang beses nilang pinanonood ang
pelikula bago sila makasulat ng rebuy. Ang pagsulat ng rebuy ay isang pasyon
at sining na pagtangkilik ng pelikula. Sikaping maging manonood muna bago
maging kritiko.
2. Alamin ang iba’t ibang elemento ng pelikula. Katulad ng ibang sining,
mayroong banghay at elemento ang pelikula na kailangang matutuhan ng isang
rebyuwer. Dito nagmumula ang lalamanin ng teksto ng susulating rebyu.

Film Review o Panunuring Pampelikula

Ito ay ang kakayahan ng manonood na makatas ang kahulugang inilalarawan ng
mga kuwadro o seryeng kuha na may kaugnay na tunog. Ang mga bahagi o seryeng ito ng
mga kuwadro sa pelikula, kung magkakaugnay ay makapagbibigay ng pangunahing fokus.
Ang panong kaisipang ito ang pinakadiwa o kabuluhan ng buong pelikula. Ito ang nabuong
resulta ng komunikasyon ng ideya at paraan ng pagkakalhad ng mga ideya.
Mga Punong Kaisipan ng Pelikula
1. PASALAYSAY ang punong kaisipan ng isang pelikula kung ang lahat ng
elmento ng kwento ay naroon. May aksyon, mga pangyayari ng sanhi at bunga,
may simula na nagpapakilala sa tauhan at tagpuan, tungo sa suliranin,
tunggalian, kasukdulan at resolusyon.
2. PANTEMATIKO, kung ipinapakita rito ang isang pagtingin sa buhay;
partikular na saloobin o perspektib; isang ideya at iba pang kaugnay na pananaw
sa buhay. Ang inaasahang mensahe ay maaaring may halagang pangkalahatan
na magagamit sa tunay na buhay.
3. PANG-ESTETIKA, ang pelikulang naglalayong mapadama sa manonood ng
mainam na karanasan. Layon nitong tawagin ng pansin ang manonood sa
pamamagitan ng pagkilala ng bago sa interes ng publiko: bagong mukha,
katawan, tinig, kakayahang umarte ng artista, aksyon, drama, katatawanan,
potograpiya at galing ng kamera, special effects, sayaw, stunts at iba pa.

Mga Dapat Isaalang-alang sa Panunuring Pampelikula

1. TAUHAN. Dapat maging malinaw ang pangunahing tauhan. Ito ang pangunahing
layunin at sentro ng suliranin (conflict) ng pelikula. Ang mga pangunahing tauhan,
ang may pinakamahalagang pag-unlad ng katauhan. Maaaring iisa, dalawa, grupo
o buong bayan. Madalas, mas kapanapanabik ang kontrabida kaysa sa bida, dahil
laging mabait ang labas niya sa pelikula. Ang kontrabida, kahit anong gawin sa
kanya ay pupuwede. Mas may kapintasan ang kontrabida, mas nakauugnay ang
manonood: Nagampanan ba ng buong husay ang kanilang papel? Dapat itong
masagot.

2. ISTORYA. Ito ay nakalulan sa iskrip. Ordinaryo na ba? Gasgas na? Kung

napanood na ang ganitong istorya, ano ang inihaing iba? May saysay ba? Malinaw
bang naihanay ang mga pangyayari? Naging kapanapanabik ba ang development
nito? Nakaaantig ba ang kwento?

Mga Elemento ng Pelikula at Gabay sa Rebyu

1. Kwento/ Banghay (Story/Plot)
Ang pelikula ay isa kwento--may simula, gitna at wakas. Isulat sa rebyu ang
sa tingin mong pinakamahalagang eksena sa iyo. Maaari ring ibuod ang buong
kwento. Huwag lamang ibigay ang kapanapanabik na mga eksena lalo na ang wakas
ng kwento.
 Ang kwento ay linyar na pangyayari batay sa takbo ng panahon. Halimbawa
nito ang kwento ng buhay mo mula noong bat aka hanggang sa maging tinedyer ka.
ang banghay (plot) ay di linyar na pangyayari batay sa pagsasaayos ng manunulat
(scriptwriter) mula sa imahinasyon at karanasan niya at batay din sa interpretasyon
at imahinasyon ng director. Kung kaya’t sa pelikula maaaring ang unang eksena ay
tungkol sa pagkamatay ng bida at ang susunod na eksena ay flashback na lamang
ng buong pangyayari sa buhay niya.
2. Karakter (Bida / Kontrabida)
Magkomento kung naging epektibo ba ang karakter man o may liriko, sa
pelikula. Ihambing din ang karakter sa dating pinagbidahang pelikula ng
aktor/artista. Nag- imprub ba ang akting? Banggitin din ang ibang natatanging
pagganap ng ibang aktor/artista sa pelikula.

3. Lunan at Panahon (Setting)

Bigyang pansin ang lugar na pinagdausan ng pelikula. Angkop ba ang lugar
sa kuwento? Naging matipid ba o magastos sa produksyon? Naging makatotohanan
ba ang depiksyon sa panahon?

4. Sinematograpiya
Ito ang sining ng pagkuha o pagrekord ng eksena gamit ang kamera na
isinasaalang-alang ang mahusay na pagpili ng lokasyon at paggamit ng ilaw. Ang
magagandang lokasyon o ang mga angkop na lugar para sa mga eksena ang siya
ring nagpapatingkad sa imortalidad ng pelikula. Subukang magkomento tungkol sa
sinematograpiya ng pelikula. Ano-anong eksena ang tumatak sa isip mo dahil sa
mahusay na paggamit ng kamera, ilaw, at lokasyon?

5. Iskoring ng Musika
Ang iskoring ay ang paglalapat ng musika, instrumental man o may liriko,
sa pelikula. Instruemtal kung walang liriko o titik ng awitin, ginagamit ang gitara,
piano o isang buoang orchestra. Samantala, uso naman ngayon ang paggamit liriko
o titik ng awitin, ginagamit ang gitara, piano o isang ng mga sikat na awitin bilang
musika rin ng pelikula. Kadalasan ito na rin ang titulo ng pelikula, o ang mang-
aawit, tulad ni Sharon Cuneta, Regine Velasquez, Sarah Geronimo, ang siya ring
bida sa pelikula.

6. Editing
Nangyayari ito kapag tapos na ang syutting o aktwal na recording ng pelikula.
Ang editor ng nagtatahi ng pagkakasunod-sunod ng eksena, kwento, at kabuuan ng
pelikula. Ginagawa ang pelikula hindi batay sa pagkakasunod-sunod ng iskrip kundi sa
maraming factor—badyet ng pelikula, availability ng cast, mahihirap/madaliang
eksena, at marami pang iba. Kung kaya’t sa post-production, trabaho ng editor na buuin
ang lahat ng eksena para maging isang pelikula. Madalas kasama ang director sa
 prosesong ito dahil desisyon ng director kung anong mga eksena ang dapat nang
tanggalin o panatilihin. Makikita ang de-kalibreng editing sa maayos na transisyon ng
pelikula na hindi namamalayan ng manonoood ang pagdugtong ng eksena mula sa iba
pang eksena.
7. Kabuuang Direksyon/Kahusayan ng Direktor
Hinuhusgahan ang kabuuan ng pelikula sa galing ng direktor. Siya ang kapitan
sa produksyon ng pelikula; ang utos at kumpas niya ang nasusunod sa syuting at maski
sa usapin ng teknikal, iskoring, sinematograpiya, at editing. Ngunit hindi niya pag-aari
ang buong pelikula. Ang scriptwriter pa rin ang maestro ng naratibo at ang prodyuser
ang nagmamay-ari ng buong produksyon at komersyal na aspekto ng pelikula. Ang
direktor ang dakilang interpreter ng iskrip at artistikong tagapamahala ng prodyuser.
Subalit sa independent films, ang direktor ang scriptwriter at prodyuser din. Sikaping
ihambing ang pelikula sa mga dating pelikulang ginawa ng direktor. Masasabi mo bang
ito ang pinakamahusay na pelikula niya? Anong naiiba sa pelikulang ito batay sa punto
de vista ng direktor kumpara sa dati niyang obra at kumpara sa pelikula ng ibang
direktor?
8. Tema
Tumutukoy ito sa pangkalahatang konsepto ng palabas at ang inaasahang epekto
nito sa manonood. Halimbawa kung ang tema ng pelikula ay tungkol sa karahasan sa
kababaihan, layunin nito na pukawin ang atensyon ng madla tungkol sa isyung ito at
magsilbing tulay upang makapagnilay o kumilos ang manonood.
9. Rekomendasyon
Sa kahuli-hulihan, banggitin kung papasa ba ito sa panlasa ng nakararami.
Irerekomenda ba itong panoorin ng lahat? Kung hindi lahat, sino kaya ang
magkakainteres sa pelikulang ito? Banggitin din ang pinakamalakas na puntos ng
pelikula at ang kahinaan nito.
Bilang karagdagan pang babasahin hingil sa elemento ng pelikula at panunuring
pampelikula i-download ang powerpoint presentation sa ating Google Classroom.
Ito ay mga gabay lamang kung paano mo susuriin ang pelikula.

III. Pagtataya sa mga Natutuhan (Assessment)

Upang matiyak na ganap mong nauunawaan ang paksang tinalakay, sikapin mong
sagutin nang tama ang kasunod na gawain.

(Hintayin na ibahagi ng guro ang link ng inyong pagsusulit sa pamamagitan ng

google forms)
 Binabati kita sapagkat tagumpay ang iyong pagsusulit. Ugaliing laging magbasa
upang madagdagan ang iyong kaalaman.

IV. Sanggunian (References)

Arrogante, Jose A. 1991. Mapanuring pag-aaral ng panitikang Filipino. Quezon

City: National Book Store, Inc.
Batnag, Aurora E. 1988. Panunuring pampanitikan II. Maynila: Linangan ng mga
wika sa Pilipinas
Villafuerte, Patrocinio V., et.al. 2006. Literatura ng mga rehiyon sa Pilipinas.
Valenzuely City: Mutya Publishing House, Inc.
www.facebook.com/TANGGOLWIKA
http://rosiefilipino10.weebly.com/teorya-ng-pampanitikan.html#/
https://www.slideshare.net/JohnJarremPasol/mga-pananaw-at-teoryang-pampanitikan
https://www.slideshare.net/GinoongGood/teoryang-pampanitikan-36790003
https://melodymular.wordpress.com/2011/06/12/mga-teoryang-pampanitikan-at-mga-uri-
nito/
https://www.slideshare.net/delcriz/pelikula