Download as DOCX, PDF, TXT or read online from Scribd
Download as docx, pdf, or txt
You are on page 1of 3
Juan un Naanus
By; Resalyn Beyag
Sijin osan ili awad tulun mansusunud ja ulila. Yajatu ja Juan, Pedro kan Pablu.Inauna si Pedro , mikadwa pay si Pablu kan inauji ja si Juan . Yaja Pedro kan Pablu kad amammison ja si Juan. Yasi Juan kad amod ja unay anus nan tagu. Gapu sijit man aamammis ja kan Juan summinnan agay siya igawan . Nangwa si Juan sigsiggay na . Ot yajit talkon ja kad nangogodwaan ja. Innalan Juan jit osan luwang. Yaja Pedro kan Pablu kad inninggaw ja sijit jajaan na voloy un inpatakjol jajit malong-ag jan para kan jija kuma un tulu. Osan alalgaw inja Pedro kan Pablo innala jit luwang Juan ot ija pinalti. Masjom man siji summaal tun Juan voloy na, inaman omya pakanan jit luwang, maid najatngananan luwang. Inummoy na inimus sijajit sunud na man kanjan “Ei Pinalti miyon a “. Yajit tinaynan jan agay kad lalat na. Amin jit vogas na kad ya inamin jan inlaku. Amod jit ligliggot Juan ngim hanna matipak winnu masintuk jajit sunud na ta jija kad naotong ja nu siya. Innalan na agay Juan jit lalat jit luwang na ot injalan na sijit voloy na. Maavus man pigan alalgaw nummoy tun Juan namaspasyal ginuvat. Ot naila na jatun Juwan mantatakaw wa lalaki sijit pon-ad kayu un manvilvillang singkavan na pilak. Innammaan Juan inobserba jatun juwa . Kavigatan na man nanpauli umvos si Juan sijin ginuvat ot inninggaw payyan jatun Juwan man tatakaw. Mikavas man osan alalgaw nanpanunut tun Juan kanan , “ Awni ka man jatun mantatakaw wa yajatu ta aminok alan janat tinakaw yu “. Ot adjit vungvung-on man inummoy tun Juan nan jaan sijit ngatun jitun kayu un man vilvillangan jajit juwa. Innala na jit lalat ot intayun na sijit ngatun jitun kayun manvilvillangan jajit Juwan mantatakaw. Iniinggaw si Juan sijit ngatun ji kayun uuwayon na jajit mantatakaw un sumaal. Mikavas man Juwan ulas sumaal jajit Juwan lalaki. Nilugiyan jan nanvilang sijajit pilak un tinakaw ja. “Kuwak tu kuwam tu kukuwak tu “kan jit man vivilang. Mamidpidwa jit ala- alannan pilak. Nadlawan jitun osan lalaki ot nan innapa ja. “Obsom manvilang!” kan jijit osa. Ot invos na payyan. “Kuwak tu kuwam tu kukkuwak tu “ kan jit lalakin namidpidwa latta jit manvivilang na. Amod ligliggot jitun osa ot nan inninapa ja. “Ngan pay jinat kawkaw-om ma , adaju nat manalan kan sika nu hakon!!!”. “Ustu tun vilang na manjongol ka usya”. Kan pay jit manvivilang sijit kadwa na . Nansinsinnungvat jatun juwan mantatakaw ot yatun Juan pay ina pinugsat jit lalat ta insavit na sijit ngatu ja. Ot namingpingsan na natokjag adjit sangun jatun Juwan lalaki ot nanvutikvutik ja ta amod pigsan jit ganipak na. “Alan! Alan!’” kanjan nanpakpakkuy ya nanvutivutik. Yatun Juan kadpay nan ininnayad ja jinumva sijit kayu ot ummoy na inamin innala jit sinsakun pilak ka tinaynan jatun mantatakaw ot inna insigub voloy na . Gapu ta makaasiyan Juan sijajit sunud na . Innummoy na inatjan jatu pilak. Uway nu umuuyung ja kan siya, pipiyoonna latta jajit sunud na. Ot nanpakwa si Juan jakolan na voloy na. “Pedro ilam kad jin voloy Juan na Jokojokolan “ kan tun Pablu . “ Itan, moyta ilan”. Pagsaal ja man nasjaaw ja adjit nanalnalman na voloy Juan . Ot amod umvos apal jajit Juwan sunud Juan, maligligliggot jan unay kan siya. Ot kan Jitun Pedro , “Nungay nu vigat ta ita sobgon tun voloy Juan?””. “Un , ommoy ta . Omoy mangayu metlang siya” kan pay ud Pablu. Vigviggat man nasapan lummikna tun Juan ot nummoy nangayu sijin ginuvat. Manpauli man ya naid tun voloy na ta singgob jajit Juwan sunud na. Amod ivil Juan sijit nakwaan jijin voloy na. “ Apo pay an jatun sunud ko situ , mangwaak kad pay voloy ija sobgon “. Ngim uway nu kamasji jit nakwa kan hiya ajina ommoy vummalos sijajit sunud na. Ot Yajit using jit voloy nan nasgob ina sininupsinup. Pigan kavan jit using nga nasinup na umavut si juwampulu un kavan. Ot ina inlaku, amin jit using kad ginulpi jan ningin-an. Jummatong man tun Juan igaw na ina umvos inatjan pilak jatun Juwan sunud na. “Nga nangalngal am situn pilak nu ?” kan jajit sunud na. “Miyan aju an , kan Pablu. “ Innalak sijit nanlakuwak ka singgob yun voloy ko, yajit using na” kan ud Juan. Yajatun Juwan sunud na kad ajija pay nanpakawan kan Juan winnu nanyaman sijit intod nan pilak kan jija. Maavus man pigan ulas kan Pablun “Pedro, vigat sobgon ta pay tun voloy ta ta ita ilaku using na”. Mawakas manya singgob ja jit voloy ja ot ummoy ja nanlaku, awad kad ommoyan jan voloy ivaga jan , “amod tun using mi yon” kan jajit kavoloyvoloy. Maid nanngina sijit using nga laku ja. Amod payyan upil jatun juwa kan Juan . “Iillan jinat Juan na yanat , itan ta ommoy ta Bugbuggon siya amod mantutuli na”. Kan ud Pedro kan Pablu. Jumatong ja man kan Juan pinakupakuyan ja siya gapu sijit nakwa kan jija “ Juan maid kad nanngina situn using mi!” kan Pablu un amod ligliggot na. “Ei najambaan yu pay nin nat alalgaw wa ajun using ji tatagu isunga maid nanngina” kan ud Juan. Gapu sijit ligliggot Pedro binugbug ja si Juan ot ija kaysan. Makalivas pigan vulan najamag Juan na natoy jajit sunud na. “Ei ot jajin sunud ko , kaasi kayu man sinat nabnabsalan yu “. Kan na agay ud Juan. Ot yasi Juan kad pumipiyya jit viyag na. Gapu sijit kinaanus na kan kinapiyan pusu na navayavayag siyan naviyag situn lap-at ji pita. Maalan Ajal: - Nu naanus kan tagu mayat nat masakvayam. - Adsam uyuyyungan janat sunud nu ta jija nat mantulung kan sika nu mankasapulan ka. - Ajika umuuyong pajam ma tagu ta manpauli kan sika janat kinkinwam kan jija. - Maid mayat un masakvayan ji tagun umaapal.